[TAFAKARI NENO YA LEO ...1] Jinsi Chuki Zinavyoenezwa Haraka.

Nakumbuka wakati fulani nilipokuwa nasoma shule ya kwanza yaani shule ya msingi, wakati huo nilikuwa darasa la sita, nakumbuka siku moja nilikuwa nilikuwa nasafiri kutoka kijiji kimoja kwenda kijiji cha pili. Wakati nikiwa nasafiri ghafla mvua ikaanza kunyesha. Njiani kulikwa na kibanda kimoja, sasa nikaona ngoja nijikinge mvua kwenye kibanda hicho. Wakati naenda ili nijikinge mvua niliwakuta watu watano na watu wote tulikuwa tunajuana japo hatukutoka kijiji kimoja lakini tulikuwa tunafahamiana kiukoo. Watu hao walikuwa ni watu wazima, walikuwepo watu wa makamo watatu na wazee wawili. Siku hiyo ilikuwa ni siku ya funzo kubwa sana katika maisha yangu kwa leo nikikumbuka.


 Mzee mmoja akawa anaongea, wakati huo mimi nimetulia kimya, akawa anasema, wewe huniwezi, wewe ni mtoto mdago sana, wewe huwawezi watu wakubwa. Mimi nisijue kwamba alikuwa ananilenga mimi na kunilenga mimi. Mimi nikawa nimetulia kimya kwa sababu nilikuwa sielewi na kwa kuwa mimi nilikuwa mdogo na watu waliokuwepo pale ni watu wazima, mimi nilitulia kimya tu.

Sasa nikakuta watu wanacheka, na mtu mmoja akamwambia yule mzee, 'wewe vipi huyo ni mtoto'! Unampima mpaka mtoto? Unajua nini? Yule mzee alikuwa ananipima mimi uchawi, sasa kwa sababu mimi nilikuwa sielewi kitu, nikawa nimetulia tu, sasa baada ya watu wazima kuongea vile ndo nikaelewa anachofanya yule mzee. Kiukweli hata nipoelewa mzee alichokuwa anafanya nikajikuta nimeduwa tu sina cha kusema.

Sasa leo imekutana na watoto wawili wanaokaa nyumba moja, mtoto mmoja akamwambia mwenzake kwamba, Bibi amesema wewe ni mchawi, huwa unachukua akili za mwenzako shuleni. Sasa mimi nikachukua hatua nikamwuliza, eti kweli bibi yako anakwambiaga wewe ni mchawi? Akanijibu, ndio. Nikamwuliza tena, Ni kweli wewe ni mchawi? Akanijibu, mimi sijui yeye huwa ananambia mimi mchawi. Huyo mtoto alikuwa bado mdogo tu, kama miaka kumi na tatu kwa makadilio. Yeye bibi yake ni mtu wa kanisani, huwa anaenda kanisani, anamhumkumu kwamba ni mchawi.

Huyu mtoto amenikumbusha mbali sana, amenikumbusha utoto wangu nami nilivokuwa nafanyiwa. Kiukweli amenifanya nicheke kwa sababu nimejifunza kitu, kwamba tunahukumiana bure tu. Mioyo ya watu imejaa ubaya, kila wakati inafikiri ubaya tu. Lakini pia nimezidi kuelewa kwamba propaganda ni nyingi sana katika maisha. Yaani mtu huwaza tu mabaya wakati wote.


 Leo hii hata watumishi wa ibadani, utawasikia kabisa, namwona jilani yako anakuloga, jilani yako ndiye mbaya wako, ndugu yako huwa anakuloga. Jamani mtumishi huyo, anaongea maneno hayo na tena maneno hayo anayaongea patakatifu. Huku ni kueneza ubaya. Tuwe makini katika kila hatua. Mtu yeyote ambaye anamwambia mwenzie mchawi, yeye ndiye mchawi wa kwanza.

Wapo watu ambao wakiumwa cha kwanza ni unabii, mtu fulani ananiloga, si homa ya bure hii, lazima kuna kitu. Mpandwa msomaji, nani anakuloga, umejaa chuki ndani yako na ndiomaana unafikiri watu wanakuloga.

Hajarishi mtu anakuloga kwa kiasi gani? Ona wema kwenye kila baya. Kwenye upendo hakuna nguvu ya kishetani ambayo husogea. Fikiria watu kwa mazuri tu, hata kama wanakufanyia mabaya kiasi gani? Acha kufikiri watu ni wabaya, sasa kama wewe ni mtumishi na unamwambia mtu ni mchawi sasa utamletaje kwa Yesu? Mpendwa msomaji, kuna tofauti kubwa sana kati ya mtu na matendo yake. Fikiri hilo.

Sadick Kilasi wa jikolaushauri.blogspot.com.

Mawasiliano ni 0687000768 au sadikila65@gmail.com.