Mwalimu Nyerere Zawadi Ya Afrika Na Dunia Kwa Ujumla.

Tafakari, Nyerere Day.

Mimi ni kijana wa miaka 25 tu, sina ufahamu wa siasa wala sijamfahamu Nyerere kwa undani zaidi. Sijabahatika kusoma vitabu vya Mwalimu Nyerere kwa sababu vitabu vyake vingi vimeandikwa kwa lugha ya kingereza. Ila nimebahatika kuangalia hotuba zake mtandaoni na kusikiliza redioni, Mwalimu alikuwa ni mtu wa kipee sana.

Mwalimu alikuwa mwanasiasa lakini mtu yeyote yule ambaye atasikiliza maneno yake atajifunza kitu kikubwa sana na kuishi maisha ya maana sana. Mwalimu alitumia kipawa chake vizuri kuhakikisha analijenga Taifa na Afrika kwa ujumla. Napenda kuingia mtandaoni na kuangalia hotuba zake mara kwa mara na nimekuwa namwelewa kuwa Mwalimu alikuwa na Elimu ya upendo yenye ujazo.

Mwalimu ni zawadi kwa Tanzania, Afrika na Dunia kwa ujumla kwa sababu yeye mwenyewe alikuwa sio mtu wa kujali makundi ya watu bali yeye alijali utu kwa ujumla. Ukisikiliza hotuba zake, alianza kwa kuunganisha makabila ya Tanganyika, Tanganyika na Zanziber na mpango wake endelevu ulikuwa ni kuunganisha Uganda, Kenya na Tanzania kuwa nchi moja. Sasa kwa mfumo huu unaweza kuelewa kwamba angelikuwa bado anaishi angefanya Afrika kuwa nchi moja na asingeishia hapo, angefanya hata dunia kwa ujumla kuwa nchi moja. Mwalimu alikuwa ni mtu wa utu,Mwalimu hakujali makundi japo alitambua uwepo wa makundi.

Unaweza kujifunza kitu kikubwa sana kutoka kwa Mwalimu, hata kama wewe sio mwanasiasa kwani Elimu yake ilikuwa katika mfumo wa upendo. Mwalimu alipinga sana mambo ya udini, ukabila, rushwa, pesa halamu na mengine mengi maovu. Sasa haya yote ni maadui ya upendo, kwani huwa yanasababisha mtengano wa watu.

Mwalimu pia alikuwa mhamasishaji mzuri sana. Moja kati ya hotuba ambazo huwa napenda kusikiliza ni ya watu kugeuka kuwa mawe. [SIKILIZA HOTUBA YAKE HAPA]. Hii ni moja ya hotuba ambazo zinatia hamasa sana katika kuyafikia matumaini ambayo umejiwekea.

Ni ukweli usiopingika, Watanzania tulipata zawadi ambayo ni Mwalimu. Kwa lugha ya kiswahili alitufanya tuishi kwa pamoja kwa undugu, na ndiomaana amani Tanzania ipo kwa sababu watu wote tumeungana kwa lugha moja ambayo ni kiswahili. Watanzania huishi kama ndugu, na hata kama kuna mambo ya chini kwa chini lakini kwa ujumla sisi tunajihesabia kama ni ndugu wa umoja.

Wale wote ambao wapo tayari kujifunza kutoka kwa Mwalimu Nyerere , basi, Mwalimu ni zawadi yao kwani elimu yake ilikuwa haina mipaka, mtu yeyote anaweza kujifunza kitu na kuishi maisha ya maana. Hata kama unaishi nchi gani unaweza kujifunza elimu ya Mwalimu na kufaidi kitu kutoka kwake.Watanzania, kuna sababu ya kumenzi Mwalimu, tujifunze kitu kutoka kwake na tufikiri kama yeye.

Umoja, amani, kuondoa umaskini ni mambo ambayo alikuwa anayapigania sana Mwalimu, basi na tuvae utayari wake kwa kuenzi kazi zake.

Sadick Kilasi wa jikolaushauri.blogspot.com.

Mawasiliano ni 0687000768 au sadikila65@gmail.com.