Nguvu Za Mwanadamu Ni Ujana, Maisha Ya Kuzingatia Ni Utoto, Vipaumbele Uzeeni, Maisha Ndani Ya Siku Moja.

Mwanadamu ni kiumbe anayezaliwa, anazaliwa akiwa hana nguvu kabisa za mwili. Mwili huanza kupokea nguvu polepole na baadae huwa na nguvu kubwa sana ambapo hiki ni kipindi cha ujana. Kutoka ujana wa nguvu nyingi huanza kupoteza nguvu zake pole pole na baadae huisha kabisa nguvu zake.

Maisha ya mtu mfumo wake umekaa kama siku moja tu, siku huanza na mwanga hafifu na baadae huongezeka na kuwa Mkali sana, kuanzia saa saba kuendelea nuru huanza kupoteza makali yake na baadae huisha kabisa.

Kipimo cha maisha yote ya mtu, kipo ndani ya siku moja, wakati wa utoto ambapo mtu anakuwa anaishi maisha halisi, kama jua linapochomoza huanza kwa kuvutia sana. Baadae mtu anakomaa na kuzongwa na mengi ya dunia, ambapo hiki ni kipindi cha ujana. Kipindi hiki cha ujana, ni kama jua kali sana linaloangaza kwa nguvu na kupoteza uzuri wake. Japokuwa ujana ndio kipindi cha nguvu nyingi lakini ndio kipindi ambacho mtu anazongwa na kila kitu cha dunia hii. Wakati wa ujana pamoja na kuwa na nguvu nyingi lakini ndio wakati haswa wa kutengeneza maisha ya mtu. Ndio fursa pekee ambapo mtu anaipata, fahari ya ujana ni nguvu zake mwenyewe.

Maisha huanza kupoteza nguvu za mwili pole pole na baadae kuufikia uzee. Ni kama jua linapoelekea mawiyo, huanza kuvutia pole pole na kupungua na baadae kupotea kabisa. Watu huanza kupoteza nguvu pole pole na baadae huisha kabisa. Maisha ya uzee huvutia sana, maisha ya uzee huwa na hekima midomoni mwao na kuishi maisha halisi. Fahari za wazee ni hekima zao.

Maisha yote ya mtu yapo kwenye kipimo cha siku moja tu, tunaishi maisha marefu ya siku nyingi lakini siku moja ndio kipimo chako cha maisha yako yote. Mpendwa msomaji, siku inapoisha huwa unafanya nini? Je hukutambua hicho ndicho kipimo chako cha maisha yote? Anza kuipa siku yako vipaumbele, ishi maisha ya uzee kwenye ujana. Wazee hufanya jambo ambalo linaleta maana kwao na huwa hawana mambo mengi sana. Mpendwa msomaji, fursa ya ujana nguvu, tukiweka vipaumbele kwenye kufanya mambo yetu kama wazee basi sisi tutafanya kwa ubora zaidi. Kijana, ishi kama mtoto, watoto wana sifa moja kubwa sana ambayo ni kuishi maisha. Kila wanapofanya jambo hufanya kwa uzingativu mkubwa.

Mpendwa msomaji, maisha yako yote yapo ndani ya siku moja, sasa ni muhimu kufanya hivi, kutumia sifa zote tatu za maisha yote ya mtu kwenye siku moja.
$#Kwanza kwenye utoto ni uzingatifu.
$#Pili, ujana ni nguvu na
$#Tatu uzee,  ni vipaumbele.

Maisha ni wakati, ni kipindi kifupi ambacho tumepewa hapa duniani ili tusababishe jambo ambalo litakuwa misingi kwa vizazi vijavyo. Kuwa mzingativu kwa kila jambo unalofanya,  fanya kwa bidii yaani tumia nguvu zako vizuri na weka vipaumbele, usisubili uzee.

Endelea kujifunza kupitia blogu hii, pia nisaidie kuwashirikisha wengine ujumbe huu mzuri. Maoni yako ni muhimu sana.

Wako Sadick Kilasi wa jikolaushauri.blogspot.com.
Mawasiliano ni 0687000768 au sadikila65@gmail.com.