Falsafa Ya Ufungaji Wa Mbuzi Na Uhuru.

Sadick Kilasi:
Falsafa Ya Mbuzi Kufungwa Na Jinsi Ambavyo Unaweza Kuishi Maisha Yenye Maana.

Habari Ndugu yangu?
Jana niliandika makala juu ya mitazamo, nikasema kwamba mitazamo ni kama oksijeni ya pili ambayo kila mmoja anapaswa kuwanayo ili maisha yakae katika mstari unaofaa na yawe maisha yenye furaha na raha ikiwa inatawala. Kama hukusoma makala hiyo wapaswa kusoma.

Kuna dhana ya kifalsafa ya mbuzi kufungwa na jinsi ambavyo unaweza kuishi. Katika maisha yetu  wafugaji wengi wamekuwa wanawafunga mbuzi kwa kamba kitu ambacho kinamfanya yule mbuzi kutokuwa na uhuru wa kwenda kule anakokutaka baada ya kuzuuiliwa na mipaka ya kamba.

Katika maisha yetu hata sisi tunatawaliwa na mipaka lakini kwa kila mmoja mmoja tofautitofauti. Wengine kamba zao ni ndefu zaidi na wengine kamba zao ni fupi zaidi. Kama ilivyo kwa mbuzi ndivyo ilivyo hata kwetu, mfungaji wa kamba anapomfunga mbuzi, mbuzi hana mamlaka ya kulalamika, na sisi pia Mungu kamweka kila mmoja aanzie sehemu.

Ili kufurahia maisha inabidi uishi na ufurahie ile sehemu yako uliyopewa bila kujali wengine kamba zao zilivyo. Usije ukaanza kulalamika na kusema, mbona kamba yangu ni fupi na wengine kamba yao ni ndefu kwa hiyo siwezi kufurahia maisha kwa sababu hapa nilipo nimeonewa. Ndugu yangu, furahia maisha sehemu uliyopo, acha kulalamika na kusahau ulikotoka.

Watu wengi huwa tunasahau tulikotoka baada ya kujilinganisha na wengine. Katika hii dunia kila mmoja amekuja kuwasilisha upekee yaani kila mmoja sehemu yake kama hufurahii hatua ya uhuru ambayo Mungu kakupa basi mimi nitakuonyesha ulikotoka na ndipo utatambua hapo ulipo ni sehemu gani na uuone uhuru wako wa kufurahia maisha ulivyo mkubwa.

Wakati hujatungwa kwenye tumbo la Mama ulikuwa na uhuru mdogo sana kwani ulikuwa ni maji maji tu kwa wazazi wako.

Ukashinda kwa kupata uhuru mkubwa zaidi kwa kutungwa kwenye tumbo la Mama yako lakini hukuwa na uhuru wa kula mwenyewe na hukutembea ulivyokuwa unataka.

Ukazaliwa ukapata uhuru mkubwa zaidi lakini hukuwa na uwezo wa kufanya lolote zaidi ya kubebwa huku na huku bila wewe mwenyewe kupenda.

Ukaanza kutembea na hapa ndipo ulipojipatia uhuru wa kuishi na kufurahia maisha. Ulikuwa una furaha kwenye kila kitu licha ya kwamba wazazi walikubana na kuweka mipaka juu yako lakini wewe hukujali sana ulichojali wewe ni kufurahia maisha tu.

Leo hii umekuwa mtu mzima, kijana mwenye nguvu, unauhuru wa kufanya mengi lakini kwa bahati mbaya umesahau hatua za uhuru wako na umejifunga mwenyewe kwa dhamiri za kwako kwa kujiloga mwenyewe na tamaa zako. Huwezi kufurahia maisha eti kwa sababu wengine wamepata uhuru zaidi yako na ukiwatazama unashindwa kabisa kulala.

Ukishindwa kupokea uhuru wa kwanza kwa shukrani huwezi kupokea uhuru mwingine zaidi.

Ishi rafiki yangu, furahia maisha popote ulipo haijarishi upo sehemu gani na wakati gani. Kama wakati wako wa kufa umefika utakufa tena utakufa ukiwa unaishi na hutakuwa na deni lolote katika maisha haya. Lakini pale  ambapo utakuwa unanung'unika utakufa ukiwa umebeba mizigo kwenye ubongo wako, yanini sasa hii yote, kwani ulikuja umebeba mizigo kwenye ubongo wako?

Hatujaja kukusanya vitu ulimwenguni bali tumekuja kutimiza yaliyotimia tayari ambayo Mungu aliandaa. Kumbuka ulikotoka na ukijali hapo ulipo utaenda mbele zaidi.

Furahia na ufanyie kazi uhuru ulionao na tambua uhuru mkubwa zaidi unaokuja mbeleni. Jifunze kwa uhuru uliopita. Mipaka yako Mungu ndiye kaweka usifisi mambo ambayo hayapo. Kumbuka kila mtu anaongoza sehemu yake.

Sadick Kilasi wa jikolaushauri.blogspot.com.

Mawasiliano ni 0687000768 au sadikila65@gmail.com.