Talanta Yako

Sadick Kilasi:
Hivi Ndivyo Ambavyo Unaweza Kujua Vipawa Vyako Na Kufanyia Kazi Mapema Sana.

Wakati nikiwa mdogo sana, nikiwa darasa la pili, nilikuwa napenda sana kuvaa saa mkononi mwangu. Naam, kipindi hicho saa zilikuwa zinauzwa elfu moja tu, saa ya kimulimuli.

Lakini nilikuwa na tatizo moja, saa ilikuwa haidumu mkononi mwangu kwa sababu nilikuwa napenda kuifungua ndani na kuitengeneza tena. Niliharibu saa nyingi lakini kuna nyingine ambazo nilikuwa nafanikiwa kuirudishia kama ilivyokuwa mwanzo.

Huu ulikuwa ni mchezo wangu, kuharibu na kutengeneza. Nilikuwa sijui ni kitu gani ambacho kilikuwa kinanisukuma kufanya hivi, wala nilikuwa sijiulizi kwanini nafanya hivyo, Mimi nilikuwa nafanya kwa kadili ninavyosukumwa kutoka ndani. Utoto nao ulikuwa unachangia kufanya vitu kama hivyo.

Sasa, leo hii wakati nimekuwa ndio naelewa kwanini nilikuwa naharibu saa na kutengeneza tena.

Mimi ni mtafiti, mtu ambaye naharibu kilichopo na kutengeneza tena kwa jinsi inavyotakiwa, naam, nafumbua fumbo lilifichwa na kufanya vile inavyotakiwa.

Talanta au kipawa ni zawadi ambayo mtu anapewa na kuwekewa katika nafsi yake ili ipate kumsaidia na kuwasaidia wengine. Kwani Mungu anaweka zawadi hii ndani yetu, na tunazaliwa nayo. Kila mtu anapewa sawasawa na makusudi yake yeye Mungu.

Mathayo 25:14, Maana ni mfano wa mtu atakaye kusafiri, akawaita watumwa wake, akaweka kwao mali zake.

Lakini kwa sababu ya maisha ya mazoea katika jamii zetu talanta hizi hupotea bure kabisa zisifanye kazi kabisa. Wengi sana tunachukuliwa na talanta za watu na wengine hatutumii chochote.

Kila mtu anatalanta yake, na talanta ya mtu hujionyesha anapokuwa mdogo, kwa sababu katika kipindi hichi Mungu ndiye huwa anamwongoza mtoto kwa kiasi kikubwa.

Kuna wakati mtoto anakuwa anafanya vitu ambavyo vinakuwa kwa mzazi wakati mwingine havileti maana kama mimi kuharibu saa. Mimi niliyekuwa mharibifu wa thamani na natengeneza thamani nyingine.

Ukisoma katika neno la Mungu utagundua kwamba Yesu alimponya mtoto ambaye alikuwa na pepo la kuangusha, na kumpeleka huku na huko tangu utoto. Marko 9.

Sasa, talanta ni kitu ambacho kila mmoja anapaswa kutia juhudi kutumia kwa sababu talanta sio ya kwako wewe peke yako bali ni kwaajili ya kuwahudumia wengine.

Kitu chochote kilicho ndani mwetu, hicho si cha kwetu kwa sababu hicho tunapaswa kutoa nje, cha kwetu ni kile ambacho tunakihitaji kwa sababu hicho tunakiingiza ndani mwetu.

Talanta yoyote inahitaji kuboreshwa na mwenye talanta kwa kutia juhudi sana, kwa sababu kila mwenye talanta atadaiwa ni namna gani ametumia. Mwanadamu hamiliki chochote tumeazimwa kwa muda Mungu atachukua kwa wakati wake.

Mathayo 25:19, Baada ya siku nyingi akaja bwana wa watumwa wale, akafanya hesabu nao.

Hapa duniani watu wanahitaji faraja tofauti tofauti  kutoka kwenye utofauti.

Ni muhimu sana kuthamini kile ambacho umepewa na Mungu uwape watu.

Na ili uthamini talanta hiyo unapaswa kuwa na shukrani na uvumilivu. Nitakupa Falsafa moja ambayo huwa tunaishi kila siku hasa vijana tunapenda sana.

Shukrani ni uwezo wa kuthamini chenga, sasa sijui ni chenga ya mchele ama chenga ya mpira, yote na yote unaweza kujifunza. Chenga ni uwezo wa kuendesha vitu vidogo vidogo, naam, chenga chenga na kuthamini kwa unyenyekevu mkubwa.

Umakini unahitajika katika sehemu hii kwa sababu ni sehemu ambayo wengine wataona ni upuuzi tu mwanzoni unapoanza kufanya lakini kwa sababu mpanzi huenda akipanda kwa machozi na kuvuna kwa furaha, wewe unatambua hili.

Kitu cha pili kinachohitajika ni pasi, naam, sijui unavyosha nguo ama unapiga pasi ya mpira lakini hapa ninazungumzia kuboresha kile kidogo ulichopokea. Kama ni chenga za ubwabwa basi hakikisha unaweka viungo ili viboreshe mchezo wako.

Mathayo 25:16, Mara yule aliyepokea talanta tano akaenda, akafanya biashara nazo, akachuma faida talanta nyingine tano.

Mwisho unafunga goli lako, unafikia kusudi na malengo yako. Hapa ndipo utawambia waliokukatisha tamaa kuwa, chenga ikiboreshwa inakuwa pasi na pasi huleta goli.

Kwa hiyo, kila mmoja lazima azingatie hatua hizi tatu, naam, hizi ni njia ambazo tunazifanya kila siku katika maisha yetu.

Kuna wakati mwingine unaweza ukawa hujasoma lakini unaweza kusoma mchezo unaendelea na ukapata majibu.

Ukihakikisha macho yako yanasoma na kulia hakuna kitu ambacho kinashindikana, ndio, malengo na kuchukua hatua ni muhimu sana.

Kama unatalanta na unaitumia vema basi Kristo atakupa zaidi ya talanta yako. Usichezee talanta yako.

Sadick Lazaro Kilasi wa jikolaushauri.blogspot.com.

Mawasiliano ni 0687000768  au sadikila65@gmail.com.

Kitabu cha Mormoni ambacho ni ushuhuda wa Yesu Kristo nakigawa hakikisha unatuma ujumbe kama unahitaji. Asante.